Yakan Blog

 

Rukun sin islam lime.

شهادة أن لا إله إلاّ الله وأن محمدا رسول الله1

1-Magnaiksaksihku gah niya tuhan saddi malaingkan allahutaalla, duk bennal teed in mohammad darakan ne magpasampay ha agama islam,

In sahada mararahi sabbut nu mintedde si teggel nu ellum.buwat malainkain labi afdal bang isab daran sabbut nu allahutaalla sa kabilang waktu hasupaya kew makahasil ridah lasa amban allahutaalla, sabab bang daran pagkikir nun pagsabbutnun si allahutaalla tahasil nu pangalasa kau allahutaalla.

وإقام الصلاة -2

Nenggehan sambahayang lime waktu, (subey teed iyan hininang minsan pe ine kasusehan kabimbangan)

In sambahayang lime waktu subey teed tinenggehan sa kabilang tekka ne in waktu, sabab in sambahayang poon sin kemon ibadat, bang gey tenggehannu in sambahayang gey magguna in agama islam si si kau, duk hatihun bi pahap tagna tagna tinanya si kau dem kubul nu yene sambahayang lime waktu.

Essubun bi bayah kaam duk gai, niya pain patekkahan pabakan yene pinag-alenan KUBUR gah ne niya pahalengan pamakuhan tabang, tunggal ibadat duk sambahayang, nah bang gah niya sambahayang ibadat saingge ne kew sangsah kew sinessekan tinepparan hap narka jahannam, hatihun bi pahap, duweru kahalan sin kubur, narka jahannam, atawa kan surga.

وإيتاء الزكاة3

3-Duk ngungsud jakat si niya arta labi labihan,( kaam meh dayahan wajib si kaam)

In pag-ungsud jakat wajib si kemon moslim si niya arta nu dem ennaan, pag-abut iye dem dantahun subey iye jinakatan ,ilanuan, in pag jakaat domain pangurung si meh makagees buwat malainkan subey inungsuran si meh pakil duk meh miskin.

Hatihun bi pahap in kaam labi labihan amban meh arta (dayahan) niya luu kapatut in meh pakil duk miskin si arta bi iyan, tantuhun bi si ginhawa baran bi dumain iyan arta bi arta allahutaalla pama indam si kaam, damikkiyan magduse kaam si allahautaalla sa hadje hadje duse si gey ungsuran bi in jakat arta bin,

4 وصوم رمضان

4-Bulan Ramadan bulan pangtangkka.

In bulan siyam bulan mahamullia si kemon bulan sarta bulan inin pinaturun weh allahutaalla in qur-an,duk bulan pag-ibdatan pagsambahayangan tarawe, bulan pagtatahajjuran sambahayang duk bulan paturan malaikat jibreil.

Si bulan siyam subey saddiyahun bi in ginhawa baran pag-ibadatan,

1-pagbassa qur-an, 2-pagjikir,3- pagsambahayang tarawe, 4-sambahayang sunnat, 5-tahajjud, 6-pagsadakka amban meh arta bi, 7-pagpakan, 8-pagpabuka, 9-paghimumungan lamma labbut si pagkahi, 10-labi awla pagsambahayang jamma si langgal, 11- labi awla pakale nasihat si meh ulama.

Si bulan siyam bulan mahamulliya, maghalli amban kemon tasabbut inin:

1-pitna, 2-kotokotohan, 3-jingki, 4-putting-dustaan 5-pangakkal 6-gandupang si pagkahi, 7-magdagey 8-bissara pangkal, 9-magdugal 10-mag-mahsiyat, 11-numpa,12-jahaluka.

5 وحج البيت لمن استطاع إليه سبيلا

5-Patulak Magnaik hadji hap makkatul makarramah sine sine amban kaam makageess atawa kan labi labihan amban meh arta bi.

In Bulan hadji.

Bulan hadji bulan si ka lime sin rukun islam wajib si kemon moslim makagees oh kaam meh dayahan magmehet mehet ne kaam magnaik hadji, daa kaam magkuriput si arta bi, sumu duk sumuddeh masi ru kaam mole si hadart allahutaalla, si gey ne magmumpaat in arta in, iyeru magmampuatin panagateyan lanu si gah niya siggul sagga ne si allahutaalla, hatihun bi pahap sine sine amban kaam makapagnaik hadji pagpag kemon duse bin kuweh kaam saka ula ula baha u pinag-anak, subey pain isab arta amban meh pagluwaslungsad bi.

http://usbawariss.blogspot.com/